與別不同得獎招牌粵菜

每年生日月都非常感恩有好多朋友為我慶祝，更費盡心思度身訂造精緻蛋糕，今年帝京酒店團隊完美演繹乜嘢係潮流觸角！我喺11號於臉書上載咗今年Pride Month party 嘅drag makeup 相，一星期後便成為我今年生日蛋糕主題～Pride Drag Rainbow Birthday Cake！當晚更品嚐咗酒店中菜廳帝京軒最新推出嘅「得獎招牌．星級饗宴」，能夠一次過品嚐多款得獎菜式，體驗與別不同的粵菜滋味，真係大滿足！

第一道菜係獲得2023香港國際美食大賽，中式烹調比賽 – 中式熱盤點心金獎嘅「鮮點三弄」，係由三款造型如壽司的點心組成，單是賣相已經滿分；「鰻魚鮮菌酥」下層嘅鮮菌酥入口香酥無比，帶濃郁菌香，加咗鰻魚粒更添口感，而「鰻魚」實為加上燒汁經火炙過嘅雞脾菇，令人驚喜萬分。而造型好似三文魚壽司嘅「椰香淮山糯米糍」，件”三文魚”其實係糯米糍皮，底層的「壽司飯」則以淮山搗成蓉加入椰汁搓成，旁邊綴以椰絲令椰香更突出，入口軟糯。「避風塘瀨尿蝦鹹水角」嘅避風塘瀨尿蝦先去殼輕炸，鹹水角中特別加入蝦乾，與瀨尿蝦互相呼應，比平時的鹹水角更添鮮味。

第二道菜「四神 – 羴」喺2023香港國際美食大賽中式烹調肉類(羊鞍)中獲得銀獎！以四神湯為創作意念，並加以變化，來個一羊三食，做出三款不同口味的菜式；首先有將羊肉切成肉末並搓成丸子，炸後蘸上五色糯米蒸成嘅「藥膳糯米羊肉丸子」，糯米口感軟綿，一口咬落羊肉丸子帶幽幽羊騷味，齒頰留香。另一款「禪衣茯苓肉骨茶羊架」，選用羊架部位切件並醃至入味，再沾上如禪衣般輕薄嘅衣漿炸至外脆內嫩，配以加入茯苓所製成的秘製肉骨茶醬汁，羊肉軟嫩，與肉骨茶醬汁配搭得宜。最後嘅「鮮淮山人參炒羊肉粒」先將羊肉炒香，底層特別以油炸鬼乘托，再綴以鮮淮山，香脆的油炸鬼與微辣的羊肉，令人吃不停口。

甜品「荔枝茶芒果朱古力慕絲蛋糕」喺2023香港國際美食大賽青年餅師組 – 朱古力蛋糕中獲得銅奬，杏仁朱古力海綿蛋糕、荔枝茶朱古力慕絲與夾著芒果粒的荔枝茶忌廉層層相間，加上榛子薄脆，口感豐富，並帶淡淡荔枝茶香氣。

其他菜式仲有2006美食之最大賞 (海鮮蔬菜組) 勇奪至高榮譽金獎嘅黃金紫玉杯；2010美食之最大賞「家禽組」獲得金獎嘅酒香棗茸雞；加埋帝京軒嘅招牌菜松露煎焗沙巴龍躉柳，同埋龍蝦湯蝦球帶子泡脆米，總共六道菜加埋甜品，都係港元688一位（兩位起）絕對係超值！