西加航空候機直播室 歌手蒞臨現場玩live

疫情期間想飛去玩都唔得，三年過去咗，大家開始復常生活，機場又開始出現人潮，而7、8月每逢星期六下午機場就更加多人，因為由上個月嘅7月8號開始，一連8個星期六下午2至3點，商業電台《香港國際機場25週年呈獻西加航空候機直播室》會降落香港國際機場；機長謝茜嘉邀請唔同歌手到場傾偈玩live，同佢哋嚟一次心理深度遊，更為旅遊精介紹你所不知道的機場員工崗位；而聽眾可留意西加航空節目，即有機會得到入場票，每個星期仲可以喺 my903.com Facebook 參加唔同主題嘅「share好相」比賽，有機會拎走2張指定地點來回機票！

首集嘉賓有Rubber Band 打響頭炮，啱啱完咗歐洲同台灣巡迴演唱會嘅RubberBand，分享佢哋周遊列國嘅經歷同埋機場體驗，仲每人都帶咗一樣旅行必備的物件與大家分享，好似泥鯭有潔癖，佢會帶洗衣袋將穿過的衣服收納好，而6號就會帶實體書去睇。仲有機場保安犬隻行動小組童童同埋佢既拍檔「爆炸品嗅索犬」Abby，同大家揭開非一般既機場崗位。四子更即席獻唱，喺炎夏中帶來兩首清涼小品。

第二個星期嘉賓係馮允謙，佢旅行必備嘅物件係眼罩，因為佢睡眠質素比較差，所以必需係沒有光線影響；而佢係旅遊中要求最高嘅係酒店房間。

第三個星期就有 MC張天賦，帶大家飛到佢心目中嘅花海，認識佢最喜歡的日本文化和美食！其實MC好怕搭飛機，佢話可能係佢膽小怕死嘅性格，一遇上氣流震動就好驚，會用力捉實座椅扶柄！而佢心目中嚮往嘅旅遊行程都係以休閒為主，好似去日本浸下溫泉，食吓美食就已經很足夠。而當日仲有國泰航空飲食服務助理行政總廚 Chef Sunny 分享製作飛機餐嘅過程同限制！

至於剛過去的星期六就有女團Collar 嘅Marf，佢嘅旅行必備物件除咗係化妝袋外，竟然係菲林相機，真係估佢唔到！

嚟緊8月仲有4位嘉賓，我只可以透露係三位女嘉賓及一位男嘉賓，至於佢哋係邊個，就要密切留意903商業電台Facebook 適時嘅報道！