藉流動酒店穿越萊茵河峽谷抵達世界遺產小鎮

不同郵輪我都坐過好多次啦，今次以River Cruises的方法暢遊萊茵河，蜿蜒穿梭於萊茵河畔風景如畫的城鎮與城市之間，秋天的黃葉景色唔止係視覺享受，亦帶比人感受到秋天嘅寧靜同美好。

我覺得乘坐河船嘅德國之旅，就好似參加咗旅行團用七日時間沿着德國Cologne開始南下，每天去唔同的地方遊覽，從令人愉悅嘅Boopard，穿過令人印象深刻的萊茵河峽谷，到德國的葡萄酒之都Mainz，再到精緻的Heidelberg 和中世紀嘅Strasbourg。

乘坐河船好處在於唔需要乘坐旅遊巴士舟車勞頓，每天要轉換酒店嘅煩擾；河船就好像一間流動酒店，有可能在你嘅睡夢中仍然繼續航行，早上醒來吃過早餐便已到達下一個旅遊城市，一切都嚟得咁悠閒舒服。

今次旅程喺德國科隆 Cologne 上船，嚟到Cologne好多人第一時間諗起古龍水4711，就連火車總站都有個大大嘅燈牌。但其實喺科隆佢唔係第一個做古龍水嘅，全球第一個做古龍水嘅品牌係Farina1709，佢比較清香及帶有citrus 味道，我覺得佢比4711味道更好聞，但價錢亦比4711貴好多。下次嚟科隆可以上網預約參觀佢哋嘅博物館及了解有關品牌的歷史。

這次旅程其中一個最期待嘅地方係Boppard，這個被聯合國教科文組織列為世界遺產，被譽為「萊茵河明珠」嘅小鎮，毫無疑問係萊茵河最具吸引力嘅小鎮之一，地理位置優越，座落在河流最令人印象深刻、被稱為「Bopparder Hamm」嘅最蜿蜒河灣。

而欣賞這個大拐彎處的半圓形全景，最佳方法係乘坐長達近一公里嘅纜車上山，在20分鐘的車程中，穿越葡萄園和森林，欣賞令人屏息嘅萊茵河景觀，抵達山頂時沿着徒步小徑到達觀景點，欣賞令人印象深刻嘅萊茵河大河套，及俯瞰整個Boppard市嘅美麗風景。