沖繩之旅 露營車體驗

撰文、攝影：Kei San

時隔三年，終於可以自由自在咁去旅行啦！
雖然我有好多想去嘅地方，但首先第一站就係去沖繩。

由香港搭飛機到位於沖繩縣首府嘅那霸國際機場都只係需要約兩個多小時，如果平時周末去個3日2夜短Trip都非常方便。

今次我想以「沖繩之旅」主題，展開我喺”潮遊天下”嘅專欄，每次會以唔同角度為大家介紹沖繩有趣之處！

沖繩文化有別於日本本土，混合了不同國家嘅文化，有種「亞洲混血兒」的感覺。而且因為有美軍基地駐紮，所以我覺得有好重美國氛圍。不論文化、氣候、季節感都同我嘅故鄉北海道截然不同，所以沖繩會令你有一種置身於日本以外嘅感覺。

相信有唔少香港人都去過沖繩，普遍都會參觀唔同觀光勝地、享受美食和購物。除此之外，我認為好多人都喜歡到沖繩離島潛水。沖繩縣海域保持住世界頂級嘅水質和環境，對於鍾意水上運動嘅朋友嚟講係最佳場所！另一方面，唔玩水上運動嘅人亦可以係海景餐廳享用美食和飲品，或者只係欣賞風景都會令你好Relax。

順帶一提，沖繩嘅輕軌鐵路暫時未覆蓋整個沖繩縣，所以租車自駕遊嘅人好多。不論去海邊酒吧、餐廳、大型商場、度假酒店都非常方便。

而今次旅行中，畀我遇到了一個似乎比租車更好玩嘅選擇 —「露營車」，租2日1夜係29,000yen起，視乎車種及日子，價錢有所不同。

仲有基本露營用品提供，例如烹煮用具、餐具、寢具、檯、燈、保溫箱等，十分方便。

相中可見露營車係可以容納 2 至 4 人嘅Size，車頂有個類似帳篷嘅空間可以容納2個人，而車箱裏可以瞓到2位成年人。

睇架露營車嘅內部好細咁，竟然有個迷你廚房同洗手盤。

你亦可以將桌子攤開到車外，如果搵到個好位置露營嘅話，必定會係個有趣嘅體驗！

沖繩縣內有10多個「露營地和汽車營地」。每個營地都有自己嘅特色，例如有些營地內有大人小朋友都可以使用嘅大型游泳設施、可租借露營裝備嘅場地，可提前預約幫你準備BBQ食材等，有各式各樣嘅服務。

於近大海嘅露營地，你可以直接從自己嘅露營車跳出去玩水上活動，亦有些露營地會舉辦水上活動體驗團供旅客參加，於玩樂中休息身心靈。

享受旅行嘅方式有很多種，你又會唔會想體驗一次露營車之旅呢？

租借露營車內容參考網頁：https://rental.asoviva-works.com/
沖繩推介營地參考網頁：https://okinawa-labo.com/campsite-47692\

作者簡介
Kei San

長居香港的北海道人。
日本食鳥協会 香港普及・啓發大使
日本FBO 及SSI 「燒酎唎酒師」及「燒酎品質鑑定士」「Food and Beverage Navigator」
Facebook: Kei San日本煮食遊
YouTube:「Japanese Home Chef」or「日本男子廚房」
透過不同媒界及演出形式，致力推廣日本不同縣市的飲食文化及美食。