餃掂手工餃子雲吞專門店

Advertisement

平時好多活動範圍都集中係蘇豪區，或者蘭桂坊區，加上都好鍾意周圍去搵啲特別嘅嘢食，啱啱經過蘇豪區附近見到一間都好似幾正宗嘅餃子店，見到周圍嘅掛畫、字畫同擺設，都好似入咗一間新式嘅北京餃子店咁樣。坐低之後就問一問服務員有咩特別推介，佢哋話最特色就係黑白松露餃子，於是點咗一份（86蚊），另外我朋友又想試下啲香口嘅煎餃，侍應就建議煎韭菜餃比較香口（47蚊）。因為我朋友半唐番，好多時關於中國嘅菜式都鍾意問長問短，啲員工非常有耐性介紹唔同嘅菜式畀我哋。

另外，我自己好鍾意中國傳統嘅冷盤小食，所以就叫咗多骨膠原嘅黑醋木耳（25蚊）同埋可以排毒嘅拍青瓜（25蚊）， 我自己就幾鍾意有辣味嘅小食，我覺得啲辣味啱啱好，加上係冷盤所以辣辣地好開胃又啱夏天食，佢哋啲材料都非常之新鮮，可惜我朋友就唔係咁食得辣。 所以大家喺叫小食嘅時候，要睇一睇同埋問一問可唔可以承受到個辣度。

第一次食到黑白松露， 黑白松露真係非常之香口、味道好濃郁，每咬一啖都有香噴噴嘅黑白松露味道，完全冇偷工減料，配嘅湯比較清淡完全冇味精，好啱夏天飲，大家都知道黑白松露係超抗氧化，簡直女士恩物。 因為我同我朋友又相機先食，又邊食邊吹水， 所以啲餃子好快就凍曬，所以提一提大家嗰啲餃子一定要熱食會更加好味。

另外，我哋仲點咗可以去水腫嘅檸檬薏米水， 加幾蚊就可以有分量大啲嘅一樽（28蚊），雖然係樽裝但係飲落同新鮮整嘅一杯杯冇分別，清新解渴提神，佢哋膠樽上面印咗個佢哋自己品牌非常可愛嘅標誌， 我個朋友話要留返嚟裝水飲添。呢一區嚟講，又係一餐好抵食嘅美顏餐！

網址: https://s.openrice.com/QrbS0sciA00~uCqvTAw
地址: 西環士美非路12號文光閣地下C號舖

Advertisement